Mahinda mangī na mangī nīkīo njugaga kaba gūtīīra gūkīra gūcererwo.
Wakinī ūrīa wakwa wītagwo Aristoto Mūtuambūri onire na kanua iyo ūtukū maitho mathiīte ūthoni Kīmende. Oimaga wīra Nyairobi thaemwe na nuthu; e matatūinī akīhūrīrwo thimū nī arata ake me handū Kīambu makīnyua. Makīmwīra akinya Kīambu aingīre kīrabu gītagwo Karemahiti Bar & Pub mamwītīrie twīrī twa mīheehū.
Nake Mūtuambūri tondū ti mūkīgu, agīkiuga na ngoro: "ona watho wa hiti namba inyanya ugaga kīndū kīoneku gītitigagwo."
Nī akinyire Kīambu emūcerangīre - thaigīrī na nuthu - no akiuga gwa kūheo ti kūingī.
Rīu kīrabu kīu kī handū hehithīte na gacīra karīa mūndū ageraga ke nduma kiasi. Akīoya gacīra kau, no thutha makinya ikūmi agīcemania na imwana ithatū cirūgamīte njīra gatagatī.
Ūrīa Mūtuambūri onirio nī imwana icio, aranjīraga ona caitani we mwenyewe ndangīhota gūtaarīria! Tondū thutha wa cekondi ithatū ahūrītwo ngeta, akanyuuo rūhī rwa mbico rūrīa rwītagwo kīmaanyina, na akaborwo mīhuko yothe.
Theinie wa cekondi ingī igīrī ona iratū ndaarī, na imwana cikīūrīra mahuti-inī.
Mūtuambūri nī eyūmīrīirie agīkinya hau Karemahiti.
Kanda ciake ciamuona e magūrū ciambire kūgūa thī na mītheko nginya cikīrīra maithori. Cigīcoka cikīmūhūnga mahūri, nake akīmaganīra ūrīa acemania na ariū a mūcukani.
Thutha wa ndagīka nyinyi kanda cigītīkanīria atī ajenda ya mbere ona ti kūgūra njohi, makīamba makīhothania thendi, Mūtuambūri agītūmanirwo kīratū namba inyanya Supamaketi ya Kamindi. Ningī makīmuongerera tūthendi tūnini twa mūhuko.